صارلي اسبوع اسوي كل شي بمعنى الكلمة علمود القسم مالتي، ما ردت اصير ممثل لكن ما ردت شخص مغرور وسيء وحمار مبين يريدها علمود بنات يصير هو الممثل، دخلت القسم وانا معدلي أعلى ب15 درجة على المعدل الادنى للقبول لأني ردته، بمكان بعيد عن اهلي وانا اصرف على نفسي كل دينار، سويت بوت تواصل وهمي علمود ما يبين هوية الشخص، بعض الناس استخدموه وشكروني، لان اكو اشخاص عدهم اسئلة ممكن تبين سخيفة أو سيئة لذلك يسألون هناك، سويت بوت ملخص محاضرات اكتبها بعد كل محاضرة ومتجهز اكتبها للشعبتين، وبوت واجبات كامل همين تختار المادة ويطلع اخر 30 يوم من واجبات الدكاترة، وسويت قناتين واتساب وحدة انشر بيها proxy مشتريه بس علمود القسم ب50 دولار 3 سنوات علمود ما نتأثر بحظر تلكرام، وهمين قناة تبليغات واتساب اذا واحد ما يريد البروكسي،
كل هذا واي طالب بسأل اي شي مهما كان ارد عليه بأسلوب حلو وبخلق، كل هذا وهمين موكل نفسي اصمم أوراق للدكتور يريدها بالملم صحيحة صرفت من جيبي 15 الف بس علمود تنضبط صحيحة، وهمين رسم هندسي كل المواد صعبة واحد يجيبها بليلة وحدة كلت الهم الي يريد خل يراسلني وانا اشتريها واجيبها الهم ببداية الدوام،
كل هذا ويجيبون مجموعة هتلية كلام من خلفي ويحجون علي ويسووني متكبر لأني تعبان على نفسي واريد اتعب على الدفعة علمود نطلع كلنا زينين، الكل حتى انسحبو من تقديم الممثل وناس انقلو لشعبتي علمود يبقون على ملخصاتي ومو شخص ثاني، لاني مهتم بيهم، وكليتلهم راح اسوي نفس الشي للشعبة الثانية لكن فضلو يمي،
كل هذا ويحاولون يبينوني "زير نساء" اتوقع يسموها بالعربي هجي،
ولد اسمه الأول مشابه للاسم الأول للشخص الي يمي من أول دقيقة بالقسم، وهذول بدأو كلام علساس نترك ارقامنا للبنات، وهو اصلا فقط 6 بنات بالدفعة كاملة.
سويت كل شي ورفضت أن اتكرم ويصوروني وابين أعلى من الطلبة الثانين علمود ما ااذي مشاعر احد، معدلي ارتفع 14 درجة بعد اعتراضي، راحت علي فرصة منحة ادرس بالخارج مجانا، واجيت هنا علمود اكدر انسى الي راح مني وابدي فرصة جديدة، وما بينت روحي "متلوك" أو احجي ويا بنات او شخص معين، حطيت الكل وياي وساعدت الكل، واريد اضل اساعد حتى لو ما كنت حكون الممثل، بس ليش هيج يصير بية؟ ليش؟ شسوي بعد؟ شيسوي الشخص بعد علمود الكل يصدقون الواقع اني اريد الخير الهم؟ شسوي علمود ما اموت منهم لان كل شغلي اخذ ساعات طويلة بس ماكو شي اثر علي مثل كلامهم هذا، حرفيا ما ادري شسوي.