باسم الطبيعة العظمى ومنطق الوجود الكوني الخالص
السلام والتنوير الدائم، والصلاة والتحية العقلية الكبرى على أطهر العقول النابغة، وأعظم خلق الطبيعة وقادة التنوير البشري؛ برتراند راسل، وستيفن هاوكينغ، وريتشارد دوكينز، ودانييل دينيت، وعلى كل تيار الفكر الحر ومسيرة العلم الإنساني في كل زمان ومكان.
نسأل الطبيعة صلابة الفهم، ونستلهم من قوانين الفيزياء والمنطق نور البصيرة للتحرر من أسر الخرافة والميثولوجيا. واللعنة المطلقة عقلاً ومنطقاً، والخزي والعار الأبدي، على كل ظلامي متسلط، وكافرٍ بالعقل والإنسانية، وكل تاجر دين وكهنوتٍ يعيث في الأرض فساداً واستبداداً وتجهيلاً للشعوب تحت غطاء السماء.
أما بعد، فهذا خطاب العقل والحرية لكل باحث عن الحقيقة:
الملحد ماكو عنده اساس اخلاقي؟
الادعاء هذا ينگال بثقة وهواي ناس تصدگه. بس الجملة تخلط اربع اسئلة مختلفة:
الملحد يگدر يتصرف اخلاقياً لو لا
من وين يعرف الصح من الغلط
شنو اللي يخلي الصح صح بشكل حقيقي وملزم
ليش يلتزم بيه اصلاً
اغلب النقاشات تفشل لان واحد يجاوب على سؤال والثاني فاهم سؤال غيره
اولاً السلوك
الاخلاق بالواقع تشتغل بدون ما نحسم وجود الله الملحد مثل اي انسان يگدر يحب ويصدگ بالحچي ويساعد ويكره الظلم.
بالاستبيانات المتدين يكول عن نفسه انه اكثر عطاء . بس بتجارب القرارات الاقتصادية اللي تقيس السلوك الفعلي يبين المتدينين بنفس مستوى الايثار تقريباً واذا تبرعوا يفضلون جماعتهم
ثانياً من وين تجي الاخلاق بدون اله
من الطبيعة الاجتماعية للانسان. عالم الرئيسيات فرانس دي وال يشوف ان التعاطف والمواساة والمعاملة بالمثل والاحساس بالعدل موجودة عند الرئيسيات وان الاخلاق البشرية اكبر منها
من العقل. كانط يكول اسأل نفسك لو الكل سوا نفس التصرف شنو يصير رولز يگول صمم القوانين وانت ما تعرف شنو مكانك بالمجتمع النفعيون يكولون قلل الالم وزيد الرفاه وارسطو بنى اخلاقه على الفضيلة وبوذا وكونفوشيوس اخلاقهم ما تقوم على اله خالق
-من التعاطف والضمير. نحس بالم غيرنا ونتضايق من الظلم وهذا مشترك بين البشر على اختلاف اديانهم.
-النقطة مو انو هاي المصادر كاملة النقطة انو هي موجودة وتشتغل
ثالث الشبهات
اذا ماكو اله شنو يمنع الملحد من القتل والسرقة؟
نفس اللي يمنع اغلب الناس التعاطف والضمير والعلاقات والقانون والمجتمع
لو خوف العقاب الالهي هو الرادع الوحيد المفروض المؤمنين ما يرتكبون جرائم وهذا مو واقع
والسؤال يظلم المؤمن لانه يفترض ان ايمانه الشي الوحيد اللي يمنعه من الوحشية. وكثير مؤمنين يسوون الخير لان ضميرهم يدفعهم مو بس خوفاً.
الاخلاق بدون اله مو موضوعية
الموضوعية تعني ان الشي صح او غلط بغض النظر عن رأي اي شخص. وهذا ما يحتاج سلطة عليا بالضرورة الحقائق المنطقية ما تصير صحيحة لان احد امر بيها
فلاسفة كثير يدافعون عن الواقعية الاخلاقية بدون اله باستطلاع PhilPapers 2020 لحوالي الفين فيلسوف 62 بالمية يقبلون الواقعية الاخلاقية او يميلون لها وبتحليل منشور لنفس الاستطلاع النسبة بين الفلاسفة الملحدين 59 بالمية
معضلة اوطيفرون. هل الشي خير لان الله امر بيه لو الله امر بيه لانه خير اذا الاولى صار الخير قرار اعتباطي واذا الثانية فللخير معيار مستقل عن الاوامر. يعني اضافة اله لوحدها ما تحل مشكلة الاساس.
والسؤال انطرح داخل الفكر الاسلامي نفسه المعتزلة والامامية كالوا ان العقل يدرك الحسن والقبح بنفسه والاشاعرة كالوا ان الشرع هو اللي يحددهم يعني فكرة ان العقل يعرف الصح والغلط مو دخيلة على التراث الاسلامي. وهذا ما يعني ان الامامية يوافقون الالحاد طبعاً
ماكو حساب ليش يلتزم؟
سؤال ليش اكون اخلاقي يتوجه لكل نظام. المؤمن ينسأل ليش تطيع الله. اذا الجواب خوفاً وطمعاً فهاي حسبة مصلحة. واذا الجواب لان الله خير فانت حكمت بالخير قبل ما تطيع.
ألملحد عنده اسباب حقيقية. علاقاته وثقة الناس بيه واحترامه لنفسه وتعاطفه واستقرار المجتمع اللي هو جزء منه. واكو محاسبة قانونية واجتماعية بالواقع.
اخلاق الملحد نسبية وتتبع الهوى
الالحاد موقف من سؤال واحد بس هو هل اكو اله. ما يفرض نظرية اخلاقية. بين الملحدين واقعيين وبينهم نسبيين فلا يصير تعميم.
والثبات مو دليل صحة. حتى التفسيرات الدينية تختلف من مذهب لمذهب ومن زمن لزمن.
ستالين وماو كانوا ملحدين
الالحاد لحاله ما يفرض ايديولوجيا ولا يدعو لشي. اللي سوّا الجرائم انظمة مطلقة السلطة بايديولوجيا متشددة.
بنفس المنطق ما نحاسب الدين على كل جريمة سواها مؤمن ولا نحاسب الالحاد على كل جريمة سواها ملحد الحكم لازم يكون على الفكرة مو على هوية الفاعل.
ألملحد ياخذ اخلاقة من الدين
اصل الفكرة ما يحدد صحتها وهذي مغالطة الاصل. حتى لو جزء من قيمنا وصل عبر ثقافة دينية هذا ما يعني ان الاساس ما يصمد بدونها
وقواعد مثل تحريم القتل والعدل والرعاية موجودة بحضارات سبقت الاديان الابراهيمية وبتقاليد مثل البوذية والكونفوشية.
التطور يعلمنا البقاء للاقوى فالاخلاق وهم
هذا خلط بين الوصف والتوصية. التطور يفسر ليش عندنا مشاعر اخلاقية. ما يگول لنا اتبعوا الطبيعة.
دي وال يگول ان الرئيسيات مجتمعات تعاونية بشكل عام وتعيش بجماعات لانها لحالها ما تگدر تعيش.
ليس الادعاء ينتشر؟
دراسة بـ 13 دولة وفوك 3000 شخص لكت ان الناس ضعف احتمال يفترضون ان القاتل المتسلسل ملحد وحتى الملحدين نفسهم عندهم نفس الانحياز يعني المسألة انحياز حدسي مو دليل على الواقع
وين الفجوات الحقيقة؟ و شنو يكول الطرف الثاني؟
حجتهم الاساسية مو ان الملحد شرير. حجتهم ان السؤال عن الاساس الوجودي للقيم مو عن كيف نعرفها. ويشوفون ان الله هو الاساس المتماسك للقيم والواجبات الموضوعية.
وجوابهم عن اوطيفرون ان الاخلاق تجي من طبيعة الله الضرورية مو من ارادة متغيرة. بس بعض الفلاسفة يردون ان هذا يرجع السؤال خطوة وحدة. هل طبيعة الله خير لانها خير.
الواقعية الاخلاقية بدون اله عندها اسئلة صعبة. شنو طبيعة الحقائق الاخلاقية وشلون نعرفها. وحجة التطور تگول لو مشاعرنا الاخلاقية تشكلت للبقاء مو لتتبع الحقيقة ليش نثق بيها. وهذا نقاش مفتوح بين الفلاسفة انفسهم.
المؤمن يشوف ان العدالة الكاملة والمعنى النهائي يحتاجون حساب اخروي. والملحد جوابه مختلف وبعض الناس يشوفونه اضعف.
بالعلم المسألة مو محسومة. تحليل لتجارب التهيئة الدينية گال التأثير سببه التحيز بالنشر وتحليل بايزي گال التأثير موجود. فما نگدر نگول ان الدراسات تثبت ان الدين يخلي الناس اخلاقيين ولا العكس.
واستطلاع الفلاسفة مو برهان. صياغة السؤال تُركت لتفسير المشاركين والاعتراض ان من يميلون للواقعية انحسبوا مع اللي يقبلونها. واغلب المتخصصين بفلسفة الدين مؤمنين.
آخر شي
الادعاء بصيغته المطلقة ما يصمد. الملحد يكدر يكون اخلاقي ويكدر يبني اخلاقه على اسس عقلانية واجتماعية بس السؤال الفلسفي عن الاساس النهائي للقيم مفتوح ويستاهل نناقشه بدون تسقيط.
اذا عندكم حجة ما ذكرتها اكتبوها و ناقشو بطريقة محترمه نفس ما اناقشكم بطريقة محترمة
المصادر
- استطلاع الفلاسفة PhilPapers 2020 والنسبة بين الملحدين: https://joelcarini.substack.com/p/most-philosophers-believe-in-objective
- ملخص نتائج الاستطلاع: https://dailynous.com/?p=40403
- انتقاد صياغة سؤال الاستطلاع: https://newdiscourse.substack.com/p/no-most-philosophers-arent-moral
- اغلب الفلاسفة ملحدين واغلب متخصصي فلسفة الدين مؤمنين: https://jaredhenderson.substack.com/p/when-philosophers-and-the-public
- دراسة van Elk وزملائه 2015 عن السلوك الفعلي مقابل الاستبيانات وتجارب التهيئة الدينية: https://www.frontiersin.org/journals/psychology/articles/10.3389/fpsyg.2015.01365/full
- فرانس دي وال عن جذور الاخلاق عند الرئيسيات: https://www.nakedcapitalism.com/2012/04/frans-de-waal-moral-behavior-in-animals.html وكذلك https://bigthink.com/the-well/primate-behavior/
- دراسة Gervais وزملائه 2017 بمجلة Nature Human Behaviour: https://ideas.repec.org/a/nat/nathum/v1y2017i8d10.1038_s41562-017-0151.html
- تغطية الدراسة وتفاصيل التجربة: https://bigthink.com/mind-brain/atheists-seen-as-immoral-even-by-fellow-atheists-reveals-new-study/
- الحسن والقبح العقليين عند المعتزلة والامامية مقابل الاشاعرة: https://en.wikishia.net/view/Rational_goodness_and_badness وكذلك https://www.shiavault.com/books/reason-faith-authority-a-shiite-perspective/chapters/4-role-of-reason-in-understanding-moral-values
- الحجة الاخلاقية لوجود الله: https://crossexamined.org/312/
- جواب طبيعة الله على اوطيفرون: https://askphilosophers.org/print/21773?page=0
- نقد هذا الجواب: https://www.moralapologetics.com/wordpress/tag/Trinitarian+metaethical+theory